Chaidh Ospadal an Àth Leathainn fhosgladh gu h-oifigeil an-diugh leis an Rùnaire Chaibineit airson Slàinte, Humza Yousaf.
Chaidh an t-ospadal, a tha mar phàirt de phròiseact £40m airson dà ospadal coimhearsnachd, fhosgladh do dh’euslaintich na bu tràithe sa bhliadhna.
Thuirt Cathraiche a’ Bhùird, An t-Oll. Boyd Robasdan: “’S e latha eachdraidheil a tha seo airson coimhearsnachdan an Eilein Sgitheanaich, Loch Aillse is Rois an Iar-dheas agus tha e a’ comharrachadh linn ùr de chùram slàinte anns an Eilean Sgitheanach, Ratharsair agus na sgìrean dlùth air tìr-mòr.
“Tha sinn air leth toilichte fàilte a chur air an Rùnaire Chaibineit dhan Ghàidhealtachd airson an dàrna turais ann an cò-là-deug airson fear de na h-ospadalan coimhearsnachd sònraichte ùr againn fhosgladh.
“Coltach ris a’ ghoireas ùr ann an Sràth Spè is Bàideanach, bidh an t-ospadal aig teis-meadhan nan coimhearnsachdan ionadal sna bliadhnaichean ri thighinn.”
Thuirt Pam Dudek, Àrd-oifigear NHS na Gàidhealtachd: “Tha an t-ospadal ùr air a bhith fosgailte do dh’euslaintich bhon Mhàrt agus tha e mar-thà a’ lìbhrigeadh sheirbheisan slàinte is cùram sòisealta aig àrd-ìre a rèir feumalachdan dhaoine anns an Eilean Sgitheanach, Loch Aillse is Rois an Iar-dheas.
“Bu mhath leam taing a thoirt dhan a h-uile neach a tha air cur ris a’ phròiseas seo a dhearbhas gum bi seirbheisean de leithid rim faotainn ann an sgìre a tha cho measgaichte, iomallach is dùthchail. Tha an obair agus an t-airgead a chaidh a chosg air an dà ospadal coimhearsnachd ann an Sràth Spè is Bàideanach agus san Eilean Sgitheanach, Loch Aillse is Rois an Iar-dheas a’ dearbhadh cho dealasach ’s a tha sinn a thaobh seirbheisean a lìbhrigeadh cho faisg ‘s as urrainn air dachaighean.”
Thuirt Humza Yousaf, an Rùnaire Caibineit airson Slàinte is Cùraim Shòisealta: “Tha mi dealasach a thaobh siostam cùram slàinte a lìbhrigeadh a tha iomchaidh agus a chuireas feumalachdan euslaintich aig cridhe chùisean. Tha an t-ospadal ùr seo san Ath Leathann a’ tabhann àrainneachd nas fhreagarraiche chan ann a-mhàin dha na h-euslaintich a chleachdas e, ach dha proifeiseantaich cùram slàinte agus luchd-obrach a tha ag obair gu cruaidh airson muinntir an Eilein Sgitheanaich.
“Is e seo an dàrna ospadal coimhearsnachd a tha e air a bhith na urram dhomh fosgladh aig NHS na Gàidhealtachd o chionn grunn sheachdainean, agus tha e air a bhith na thlachd dhomh fhìn faicinn a’ bhuannachd a tha iad mar-thà a’ toirt do mhuinntir na Gàidhealtachd.”
Thuirt Paul McGirk, Cathraiche Gnìomh hub North Scotland, a tha na chom-pàirtiche leasachaidh le NHS na Gàidhealtachd: “Seo an dàrna ospadal coimhearsnachd a thug sinn gu buil gu soirbheachail airson NHS na Gàidhealtachd agus a tha a’ cuideachadh nan coimhearsnachdan sin a bhith nas treasa ann a bhith lìbhrigeadh seirbheisean cùram slàinte.
“Tha dòigh-obrach co-obrachail air a bhith aig na com-pàirtichean uile, agus feumaidh mi taing a thoirt do choimhearsnachd an Àth Leathainn airson an taic ionmholta a chum iad rinn is sinn a’ feuchainn ri leantainn oirnn leis a’ phròiseact seo tron ghalar mhòr-sgaoilte.”